Oumento suèldo mínimo entrante promé di yüli 2024

Notisia | 16-09-2024 | 23:41

Suma liber di impuesto i suèldo mínimo

Pa e aña di impuesto 2024, e suma liber di impuesto ta basá riba e suèldo mínimo legal, teniendo kuenta ku e oumento di e suèldo mínimo entrante promé di yüli 2024. E meta di e konekshon aki ta pa sòru ku un empleado ku ta gana e suèldo mínimo legal, no mester paga impuesto riba e suèldo aki.

Retenshon riba suèldo den kaso di oumento suèldo mínimo

E oumento di e suèldo mínimo entrante promé di yüli 2024 kombiná ku aplikashon di e tabèlnan di impuesto riba suèldo, den algun kaso por hiba na retenshon riba suèldo, siendo ku riba un base anual no ta debe retenshon riba suèldo. Esaki ta debí ku empleadonan ku un suèldo mínimo den e promé seis lunanan di aña no a utilisá e suma liber di impuesto kompleto, i den e último seis lunanan di aña ta sali un tiki mas haltu ku e suma liber di impuesto. E retenshon aki ta trata di solamente algun dòler pa luna.

Sifra i kalkulashon

E suma liber di impuesto pa 2024 ta USD 20.424,-, loke pa luna ta USD 1.702,-. Den e promé seis lunanan di aña 2024, e suèldo mínimo legal mensual tabata bou di e suma liber di impuesto. Sin embargo, entrante promé di yüli 2024, a oumentá e suèldo mínimo legal hasié USD 1.750,67, loke ta riba e suma liber di impuesto.

Desishon Sekretario di Estado di Finansa

Sekretario di Estado di Finansa a aprobá ku esun ku e deber di retené impuesto no mester hasi retenshon riba suèldo, basta kumpli ku e siguiente tres kondishonnan:

1. E suèldo mínimo ku a akordá ku e empleado ta USD 10,10 pa ora.
2. E kantidat di ora di trabou máksimo ta 40 ora pa siman.
3. E empleado tin derecho riba e suma liber di impuesto i ta kobra esaki serka esun ku e deber di retené impuesto sigun artíkulo 8, insiso 2, di e Wet op de Loonbelasting BES (Lei Impuesto riba Suèldo BES).

Retenshon riba suèldo pa empleado

Un empleado ku un siman di trabou di un máksimo di 40 ora, ku durante henter aña ta gana e suèldo mínimo i ku no tin otro entrada, lo no debe retenshon riba suèldo dor di aplikashon di e suma liber di impuesto.

Proseso di korekshon den kaso ku a hasi demasiado retenshon riba suèldo

Si abo komo esun ku e deber di retené impuesto a hasi demasiado retenshon riba suèldo, bo por tuma kontakto ku bo atministradó di salario pa e proseso di korekshon. Asina lo sòru pa paga bèk e retenshon dimas direktamente na e empleado. Si esaki no ta posibel, e inspektor ta duna kooperashon na petishon di korekshon den kaso ku a hasi demasiado retenshon riba suèldo.

Areglo temporal

E desishon aki ta temporal i ta konta di promé di yüli 2024 te promé di yanüari 2025. Por haña e teksto kompleto di e desishon aki via e lenk aki bou:
https://www.officielebekendmakingen.nl/stcrt-2024-24267.html