Kambionan fiskal Boneiru, Sint Eustatius i Saba entrante promé di yanüari 2025
Entrante promé di yanüari 2025 un serie di medida fiskal ta drenta na vigor na Boneiru, Sint Eustatius i Saba. Ku e kambionan akí, gabinete ta pone énfasis riba protekshon di entradanan abou i modernisashon di e sistema fiskal. Asina por ehèmpel ta konektá e suma liber di impuesto ku e suèldu mínimo. E kambionan ta parti di e Plan Fiskal BES, ku Eerste Kamer a aseptá 17 di desèmber.
E Plan Fiskal BES ta kontené un kantidat di medida importante, di manera ku ta logra mas ekilibrio den e sistema fiskal na Boneiru, Sint Eustatius i Saba, den kua ta tene mas tantu kuenta posibel ku habitantenan ku un entrada mínimo.
Adaptashonnan mas importante
Un di e medidanan mas importante ta, ku ta konektá e suma liber di impuesto (BVS) ku e suèldu mínimo legal (WML). Ku esaki ta konektá ku e suèldu mínimo di mas haltu, ku na Sint Eustatius ta na vigor. E konekshon akí ta prevení ku habitantenan ku un suèldu mínimo tin ku paga belasting. Pa medio di e adaptashon anual akí, e suma liber di impuesto ta keda den liña ku sirkunstanshanan ekonómiko.
Otro medidanan ku tin den e Plan Fiskal BES, tambe ta drenta na vigor entrante promé di yanüari 2025. Asina por ehèmpel ta redusí e paso pa e di dos grupo di ‘inkomstenbelasting’, di USD 322.769 na USD 51.250. Ademas ta ahustá ‘vastgoedbelasting’ riba dos punto: ta kòrta e areglo di invershon di dies pa sinku aña i e tarifa pa hotèl ta subi di 10% pa 11%. Mas aleu ta hisa e tarifanan di ‘opbrengstbelasting’ i ganashi for di interes konsiderabel (aanmerkelijk belang) di 5% pa 7,5%. Tambe e eksonerashon pa sumanan di reskate komo parti di e suèldu i indemnisashon di daño i perhuisio ku ta risibí den forma di un derecho riba kompensashonnan periódiko, ta kaduká.
Ademas gabinete ta bai vigilá efekto di e medidanan den e Plan Fiskal BES den 2025. Si e medidanan kondusí tòg na bahada di entrada bou di e mínimo sosial, lo wak e ora ei si por i kon pa drecha esakinan.
Modernisashon i simplifikashon
Banda di e medidanan di entrada, gabinete ta implementá mehorashonnan tékniko, manera revishon di regulashon relashoná ku atministrashon di suèldu i simplifikashon di e legislashon fiskal. Esaki ta hasi e sistema mas kla i mihó adaptá na práktika. Un resúmen kompleto di tur e kambionan por haña akí https://www.rijksoverheid.nl.