Kòntròl marítimo i kòntròl di entrada, salida i tránsito durante di e 56 edishon di Bonaire Sailing Regatta
E di 56 edishon di Bonaire Sailing Regatta ta inisiá dia 6 di òktober. E aña aki tambe partnernan di kadena di e tim Multidisiplinario Marítimo Hub Boneiru (MMHB) lo ta aktivo pa tene Boneiru seif durante di Bonaire Sailing Regatta.
Duana, Koninklijke Marechaussee (KMar), Wardakosta, Kuerpo Polisial Hulanda Karibense (KPCN) i Entidat Públiko Boneiru (OLB) lo supervisá i kontrolá riba kumplimentu ku tur lei i ordenansa ku ta na vigor i di importansia pa kada partner di kadena. E servisionan lo sostené otro durante di ehekushon di e tareanan aki. Ademas lo tin empeño èkstra for di e diferente servisionan na momentu ku yudansa di emergensia ta nesesario.
E supervishon i kòntròl lo tuma lugá den e awanan entre Kòrsou i Boneiru, rondó di Boneiru i den bahia di Kralendijk.
Duana
Duana ta supervisá tráfiko di bienes ku ta krusa frontera i ta kontrolá si ta sigui e prosedura korekto na momentu di entrada, salida i transito i tambe si no tin artíkulo prohibí presente.
KMar
Koninklijke Marechaussee ta responsabel pa kòntròl di frontera na Boneiru. Hasiendo esaki Kmar ta kontrolá e kondishonnan di entrada di persona i tambe ta kontribuí na kombatimentu di kriminalidat ku ta surpasá frontera.
Wardakosta
Wardakosta lo ehersé kòntròl riba balides di dokumentu di boto manera tarheta di registrashon i pèrmit pa nabegá. E dokumentunan di barku aki mester ta bálido pa área di Boneiru. Banda di esaki Wardakosta ta kontrolá tambe e kantidat di persona ku tin na bordo di un boto konforme e karchi di kùr i ta mantené órden públiko i seguridat.
KPCN
KPCN ta responsabel pa mantenshon di órden públiko i pa duna asistensia na un i tur ku mester di esaki.
OLB
OLB ta supervisá uzo korekto di bui i kaminda di mara pa boto. Esaki ta inkluí kòntròl riba ankramentu i ta retirá bui ku no ta outorisá. Durante di Regata ta permití pa mara pa un ratu na e nort pir pa atendé ku duana, pero boto no mag keda mará einan. Relashoná ku e multitut ta konsehá doño di boto fuertemente pa regla un lugá di mara promé ku nabegá pa Boneiru.
MMHB ta hasi un petishon na un i tur pa subi awa bon prepará i pa den kaso di pregunta tuma kontakto ku e servisio konserní.