Sosten pa mayornan perhudiká dor di e asuntu di supsidio di akohida pa mucha na Hulanda Karibense, a kuminsá
Entrante djaluna, 16 di mei, a kuminsá ku sosten pa mayornan perhudiká na Hulanda Karibense. For di Belastingdienst Caribisch Nederland (BCN) Maaike Umbelino – van Sleen ta kordiná i organisá, e sosten nesesario pa mayornan perhudiká riba e islanan di Hulanda Karibense.
Na Sint Eustatius i Saba ainda no tin persona perhudiká di e reklamo di supsidio di akohida pa mucha. Na Boneiru a hasi e promé kontakto ku mayornan perhudiká ku ta deseá sosten. E sosten ku tin mester i esun ku ta ofresé ta dependé di e sirkunstansianan personal di e mayornan i famia. E punto di salida ta pa ofresé mayornan i nan famia un 'komienso nobo' i garantisá ku nan ta haña e sosten adekuá pa bolbe pone nan bida riba e ruta korekto despues di e konsekuensianan di e reklamo di e supsidio di akohida di mucha.
Maaike Umbelino; 'Mayornan afektá ku mi a papia kuné tokante esaki tin un elastisidat enorme. Laga tur kos atras, for di un situashon di strès na Hulanda, ta rekerí kurashi. Biniendo for di Hulanda, no ta semper fásil pa sigurá ku tur miembro di famia ta sinti nan mes konfortabel i ku nan por konstruí un bida nobo ku nan famia. Mi ta kontentu pa wak ku nos por duna e mayornan un respaldo.'
Ora ku bo ta perhudiká dor di e konsekuensianan di e supsidio di akohida pa mucha, UHT ta puntra si por manda bo datonan na e tim di sosten pa Hulanda Karibense. Si bo duna pèrmit pa esaki, Maaike lo tuma kontakto ku bo despues di esaki pa asina hiba un kòmbersashon ku bo i bo famia. Si bo tin pregunta pa Maaike tokante e sosten na Hulanda Karibense, e ora ei bo tambe por tuma kontakto direktamente.
Si bo ta deseá di haña mas informashon, bishitá https://www.belastingdienst-cn.nl/onderwerpen/ondersteuning-gedupeerde-ouders-kinderopvangtoeslag