Resúmen proposishon medidanan den lei fiskal BES entrante 1-1-2020

Notisia | 01-01-2020 | 20:18

• Introdukshon di obligashon di faktura Algemene bestedingsbelasting;
• Tarifa di 0% Algemene bestedingsbelasting pa outonan eléktriko
• Obligashon pa warda dokumento igual pa tur ku ta obligá di tene atministrashon;
• Kompensashon di interes ora Belastingdienst Caribisch Nederland paga bèk muchu lat;
• Sumanan limitá pa duna bèk i pa pago di impuesto Hulanda Karibense;
• Pidimentu di kuentanan anual.

Akibou ta duna splikashon kòrtiku di e medidanan.

Introdukshon obligashon di faktura Algemene bestedingsbelasting

E medida ta trata introdukshon di un obligashon di faktura pa tur ku, sin ku ta den servisio, ta hasi trabou pa òf duna servisio na terseronan.

E rekargo di ABB riba suministronan interno di servisio na e momentunan akí no konosé un obligashon di faktura. Den kaso di dunamentu di servisio e empresario na Hulanda Karibense no mester menshoná e impuesto riba su resibu òf bòn di kaha. Suministro di servisio dor di un empresario ku no por ser konsiderá un produktor, no ta kai bou di e rekargo.

E falta di obligashon di faktura ta trese limitashonnan pa BCN por hasi kontrolnan, partikularmente di inkomstenbelasting i ABB.

Tarifa di 0% Algemene bestedingsbelasting pa outonan elektróniko

E medida akí ta un kambio den ABB na Hulanda Karibense, esta ta hasi mas estrikto e kriterionan pa e tarifa di 0% pa ABB pa e kategoria di ‘outonan hopi ekonómiko’.

E tarifa di ABB pa importashon di outonan di famia na Boneiru ta 25%. Pa ‘outonan hopi ekonómiko’ ku un emishon di CO2 di no mas di 110 gram pa kilometer (gasolin) òf 95 gram (diesel) ta apliká un tarifa di 0% di ABB pa importashon. Pa determiná si un outo ta ekonómiko, a inkluí na 2011 límitenan di CO2, ku den lei nunka a keda adaptá na e desaroyonan teknológiko.

Ta proponé pa apliká e tarifa di 0% solamente ainda pa outonan ku no ta emití CO2. Den práktika esaki lo ta mas tantu e kaso pa outonan di famia ku ta kore solamente eléktriko. E medida ta riba petishon di ehekushon. Banda di esei stimulashon di uso di outonan di famia ku no ta emití CO2 ta kuadra ku e esfuerso pa hasi Hulanda Karibense bèrdè.

Obligashon pa warda dokumento igual pa tur ku tin obligashon di tene atministrashon

Den ‘Belastingwet BES’ tin pará komo regla prinsipal pa esnan ku ta obligá di tene atministrashon, un obligashon pa warda dokumentonan shete aña largu. Komo eksepshon riba e regla prinsipal akí ta apliká pa deklarashonnan di loonbelasting, un obligashon pa warda dokumento di por lo ménos dies aña. Den e lei ‘Douane- en Accijnswet BES’ (DABES) ta apliká tambe un término di dies aña. Den práktika e diferensia akí ta krea konfushon. Ta proponé pa hasi e términonan akí igual dor di apliká un término di shete aña pa deklarashonnan di loonbelasting i pa DABES tambe.

Kompensashon di interes ora Belastingdienst Caribisch Nederland paga bèk muchu lat

A base di kapítulo 8 di Belastingwet BES ora e persona ku debe belasting paga muchu lat, e mester paga un interes di kobransa, pero no tin kompensashon di interes ora Belastindienst Caribisch Nederland (BCN) paga bèk muchu lat. Ta proponé pa di awor padilanti duna kompensashon di interes ora BCN paga muchu lat.

Sumanan limitá pa duna bèk i pa pago di impuesto Hulanda Karibense

E lei ‘Wet inkomstenbelasting BES’ ta regla entre otro den kua kaso ta stipulá un ‘aanslag’ ku un suma ku mester paga i den kua kaso ta dedusí rekargo ku a kobra di antemano. Ta proponé pa apliká e mes areglo pa situashonnan kaminda a rekargá suèldu segun e tabèl pa pago partikular. Te ku awor ta apliká un areglo diferente pa suèldu rekargá segun e tabèl pa pago partikular. Ta proponé pa eliminá e areglo diferente akí, pa fasilitá ehekushon i pa simplifiká regulashon.

Pidimentu di kuentanan anual

E medida ta enserá ku entidatnan ku a base di Belastingwet BES ta ser konsiderá di ta establesé den Hulanda, tambe ta obligá pa entregá un kopia outentiká di e kuenta anual serka e Inspektor di impuesto.
Akseso na e kuenta anual ta yuda Belastingdienst Caribisch Nederland (BCN) ora di hasi di kontròl. Ounke e entidatnan konserní akí no ta obligá di paga winstbelasting na Hulanda Karibense, nan ta paga si otro impuestonan na Hulanda Karibense, manera algemene bestedingsbelasting (ABB) i (na nòmber di e trahadónan) loonbelasting. E datonan riba e kuenta anual ta duna BCN informashon relevante ora di mantenshon di demas impuestonan.

Vastgoedbelasting

Lei di impuesto BES (Belastingwet BES) ta brinda e posibilidat pa duna eksonerashon na sierto instansia- i organisashonnan pa pago di vastgoedbelasting. Ta trata di organisashonnan karitativo (di karidat) òf kultural, organisashonnan ku ta sirbi interes públiko òf sosial, i organisashonnan di dunadó di trabou òf trahadó (sindikatonan). Kondishon ta ku e organisashonnan akí ta usa e bien inmóbil (e edifisio ku no ta un bibienda riba su mes) nan mes òf práktikamente nan so. Tambe nan no mag hasi ganashi i no kompetí ku organisashonnan ku si ta (kier) hasi ganashi. E medida akí a drenta na vigor ku forsa retroaktivo te promé di yanüari 2018. E instansianan menshoná den e anekso ku ta kompañá e lei, ta kumpli segun Belastingdienst ku e kondishonnan akí.

Por lesa e teksto hurídiko den artíkulo 4.4, insiso 1 di Belastingwet BES.

Si bo tin pregunta tokante esaki, si bo ta di opinion ku bo instansia òf organisashon tambe mester ta riba e lista, tuma e ora ei kontakto ku Belastingdienst sekshon vastgoedbelasting.